بسم الله الرحمن الرحيم
طبعا اسم البوست غريب المون البوص
يمكن الاسم دة علشان بيتقال علي طول فا هو اللي جة في بالي
المهم
تالت حد هتكلم عنة انهاردة واوعدكم مش هتكلم علي اصدقائي تاني
علشان عارفة خنقتكم من كتر الحكايات
بس بجد
ماينفعش متكلمش عليها علشان هي فعلا عزيزة عليا موت
بس انا اللي هتكلم عنة انهاردة هو شخصيتها
اولا
اتعرفت عليها
عن طريق مروة لانها بنت خالتها
بس حصل موقف قبل ما اشوفها مع مروة
وهو
في اولي ثانوي كنا بناخد مراجعة في معهد
شوفت واحدة واتعرفت عليها
اسمك اية مني وانت اماني
مدرسة اية انا في مدرسة كذا وانت كذا
علي فكرة انا بنت خالتي معاكي في المدرسة بتاعتك
والله
اسمها اية
اسمها مروة
انا بردة صحبتي اسمها مروة مم طيب
كل دة وبنتكلم علي مروة واحدة وانا معرفش انها قصدها علي مروة
وهي بردة متعرفش
المهم قعدنا نحكي واتصاحبنا واحنا منعرفش اننا اصلا نعرف بعض لان كان كلامنا تلييفونات او مروة تحكيلي عليها
وبعدين قولت لمروة انا شوفت واحدة وهي حكت لمروة عرفنا بعض
وفي الاخر طلعنا نعرف بعض من زمان وطلعنا جيران
بيت جدها ادام بيت جدي وعممها كانو بيلعبو مع خلاني في الشارع
:(شوفو الصدف
المهم طبعا اتصاحبنا لما دخلنا الكلية وبقينا قسم واحد بس
الغريب في المون
نتفق انا وهي ومروة هنذاكر اية وبعد ما تقولنا ماشي
تروح تذاكر حاجة تانية
نقولها لية بس يامون
تقول لاقيت نفسي عايزة اذاكر دة
لا وبتزعل اننا مش ماشين مع بعض وهي السبب اصلا
المهم اننا نجحنا كلنا بس المون بتموت في الاختصار
ان كان في المذاكرة او الاجابة:)
عايزة ابقي اسيطها شوية المون رسامة تحفة هي من منازلهم بس عندها موهبة جميلة
هعرض رسومات ليها ويارب تعجبكم
