بسم الله الرحمن الرحيم
**********
اولا بشكر كل اللي كان متابعني رغم اني ماكنتش بعلق عندة
ثانيا هدخل في الموضوع علي طول
انا اتخرجت ياجدعان
هي اة النتيجة لسة متطلعتش بس تطلع زي ما تطلع
المهم اني خلصت
وان شاء الله هنجح باذن الله يارب
حاسة اني حد تاني غير اللي كان
حاسة اني فاضية ومشغولة في ان واحد
نعمل فلاش باك
عودة اللي الماضي شريط الذكرايات
اربطو الاحزمة اللي اد البوست يكمل اللي مش قدة مسمحاه انهاردة يوم التسامح
الطفولة المبكرة
هههه
في البدايات هحكي كلام اتقالي انا طبعا مش فاكره لاني كنت نونو وقتها خالص
فا ماما قاللتلي
اول ما كبرت شوية
اتكلمت وانا عندي سنة ومشيت وطلعت كل السنان
كل دة وانا لسة عندي سنة واحدة
خارقة من صغري
وبعدين وانا عندي
سنتين
ماما ودتني مكان كدا زي حضانة كدا مش بيدروس بجد اللي هو بتسربني
فاقالتلي اول يوم سبتك فية
عملتلك السندوتشات واديتك موز وعصير
فا المدرسة قالتلها امشي وسبيها علشان تاخد علي المكان
فا طبعا انا ماسكة في ماما عياط عياط عايزة اروح بقي اية العيال دي كلها
قامت المدرسة قالتلها لو خايفة عليها اقفي بصي عليها من الشباك
فا طبعا ماما مشيت وطلعت تبص من الشباك
فايلا طلعت السندوتشات
قعدت اكل رايحة رحلة اصلي ههههه
وبعدين اخدت بالي من ماما من الشباك
لا نبيه يابت طول عمرك
فا سبت الاكل وبصيت عليها وقعدت اعيط عايزاها تيجي تاخدني
قامت مستخبية قومت مطلعة الموزة واكلتها ههههههه
باين عليا كنت بتطلع غلي في الاكل
تصدقو فعلا انا لماببقي مضايقة باكل ولما ببقي مبسوطة بحس اني شبعانة وكاني اكلت بقالي سنين
من شب علي شئ شاب علية فعلا
لحد ما اتعودت
جيت بقي تلات سنين
دخلت كي جي 1
كنت في مدرسة ف الاول وحولت منها بعدها بكام شهر
رحت علي
مدرسة تانية
كان فيها كل اقاريبي
دخلت فيها وانا مستغربة العالم الجديد وبفتكر من الايام دي ذاكرتي قوية صح
كان المدرسة فيها مسجد كبير كنت عاملة زي مغامرات عماشة في الادغال
كل يوم اشوف الباب وهو بيفتتح وهو بيقفل ونفسي ادخل جوة لكن كان ممنوع علي الاطفال
المدرسة كانت عبارة عن فصلين
1/1
1/2
انا دخلت في الاول
1/2
الفصل دة كان معروف عنة ان البنات اللي فية كلها حلوين جدا
اما فصل 1/1
كان الولاد احلي من البنات
فا اللي هو الولاد كلهم بيحسود ولاد 1/2 والعكس
انا بقي متحرمتش من حاجة كنت في 1/2
قعدت سنتين
وكنا مع الفصل التاني عاملين زي اعداء منافسات في كل حاجة حتي في الرياضة
جيت حولت في اولي ابتدائي من الممدرسة كلها
وقضتها في البيت علشان المدرسة التانية ماكنتش لسة قبلتني
وكانت اجمل سنة في حياتي
قاعدة زي الملكة والمدرسين داخلين طالعين من غير ما اروح مدرسة ولا طابور ولا بتاع
وبعدين رحت سنة تانيةابتدائي في المدرسة الجديدة
ميح طبعا
مش فاهمة حاجة في البتنجان
فا جزاها الله كل خير
ميس امل ام عبد الرحمن
مشهورة بكدا يعني
حطني في دماغها كانت بتدينا عربي ودين
كانت بتشوف خطي وحش تبهدلني وتقطعلي الكراسة
مش عاملة الواجب توقفني برة
انا كنت في الاول مش بحبها خالص من اللي بتعملة فيا وانا رقيقة كدا
وبعدين عرفت اد اية الست دي عايزة مصلحتي
فا مرة كانت لامة كل الكراسات الدين والعربي الحصة والواجب وقالت هتعلمهم
فا جة الدور علي مجموعة كراساتي
ندت علية
وقالتلي اقفي
وقفت قامت ماسكة الكراسات كلها تقطيع تقطيع لتالت مرة
قولت اية الست المفترية دي هو انا بلاقي الكرسات ماما بتحسبني بديهم لدادا زي السندوتشات
لاني كنت بتكسف اكل ادام حد وماكنتش باكل ابدا السندوتشات
فقعدت اعيط اعيط قولت اية الافتري دة بتعمل كدا لية
قالتلي مش كاتبة الواجب كلة وكاتبة علي سطر والباقي نازل يشرب من البحر وخطك وحش والاملاء غلط
انا لن انسي لها هذا الموقف
قامت قاللتلي اديني رقم ماما فا ادتها
اتصلت فااماما فهمتها اني اولي ابتدائي مارحتش مدرسة ومش فاهمة حاجة خالص
فا صعبت عليها بقي وبقيت تلميذتها المفضلة
بقت واحدة واحدة تشرحلي وتفهمني وبقت كراساتي احلي كراسة في الفصل
وحببتني قوي في الدين وكانت لابسة نقاب او خمار فا كنت نفسي اكبر علشان البس النقاب زيها
وقولت الست دي هتخليني متفوقة في العربي والدين كانت فعلا شاطرة وعندها ضمير
كنت اول ما رحت المدرسة دي الباص يعدي عليا يفضل كلاكس كلاكس وانا لسة في السرير
اقوم البس جريييي
وانسي اربط رباط الكوتشي
يقوم السواق رابطهولي ومطلعني الاتوبيس كل يوم علي كدا
لحد ما في يوم قال لماما جبلها اللي بيزلق اسهل يا مدام
المهم المدرسة دي كان فيها مدرسة كل يوم تيجي لافة شعرها سوسات
كنت بستغرب عليها اية الي هي عملاه في شعرها دة
فا كان وانا صغيرة ماما قصالي الاوصة شكل غريب كدا
وكان شعري تقيل وجميل وقتها
فا كانت بيتيجي كل يوم تقولي
انت يامااما
بتلحقي تلفي شعرك امتي
اقولها يعني اية الف شعري قالتللي يعني تحطي فية سوسات زي كدا قولتلها لا انا مش بحط فية حاجة قامت قالتلي انت لابسة باروكة ولا مركبة شعر
قولتها لا قعدت تشدلي في شعري ومش مصدقاني
وجت يوم من الايام واحدة قامت قالتلها مني شعرها كبير ومش شايفة منها
طبعا انا كنت بلية ومازلت بلية يعني مش بقي للدرجة هغطي عليها فا قالتلي قومي اقفي
بكرة تيجي قاصة شعرك دة كانت متغاظة منة قوي وشدتني منة وقعدت اعيط
وجتلها بقي ماما تاني يوم قالتلها بنتي مش بتعمل شعرها سشوار كل يوم زي ما بتقوللها ولا بتلفة هي شعرها تقيل كدا
قعدت تقولها بالعكس دي امورة دة انا بحبها قالتلها اة بحسب وقص شعر مش هيتقص
قاللتلها ماشي يامدام براحتك
اي حد عندة خناقة يقول لماما كانت بتيجي تظبط المدرسين
المهم رجعت تاني في سنة تالتة ابتدائي
مدرستي التانية
بتاعت اول وتاني
وانا طبعا كل صاحبي كانو تاني
بس ماما نقلتني اول
وقالتلي دول اشطر
بكتير من تاني
قولت مصلحةحتي ولاد الحلوة كلها في اول
ههههه اوعو تفهموني غلط
بس زعلت شوية صغيرة خالص علي البنات صحابي من تاني بس قولت ابقي اشوفهم في البريك بقي
وبدات الصراعات
كنت نصي مع تاني ونصي مع اول ولكن جت اللحظة الحاسمة اللي لازم اختار انا مع مين
كان الولاد بيلعبو كورة
وابتدي فريق تاني يقول
حط كوسة علي كوسة 3/1 موكوسة
حسيت اني لالا انا لازم اختار فريق
وقعدنا نرد عليهم كلنا وكسبناهم وكرهت فصل تاني كره منافسة مش اكتر
كانت بنت خالي رانيا اكبر مني بسنة4/1
وابن خالتي كان في5/1
واختة كانت في 1/1
كنا مشهورين قوي في المدرسة وحسن اخوية كان في كي جي
وكنا كل سنة مع بعض نروح من المدرسة ونرجع وكان ابن خالي وبنت خالي يوصلونا انا وعبير واحمد وحسن
وكنا كل سنة مع بعض نروح من المدرسة ونرجع وكان ابن خالي وبنت خالي يوصلونا انا وعبير واحمد وحسن
ورامي ورانيا ولاد خالي يروحو
وكنا بنخلي احمد يشلنا الشنطة
وناخد الطريق جري من المدرسة للبيت بنجري ورا بعض
ورانيا كانت كل يوم تشتري موزايا وتاكل كاس جلي عند محل ايس كريم ادام المدرسة
وفي يوم قولتلها روني انت بتجيبي الموز الكبير دة منين
قالتلي من بياع اادام المدرسة قولتلها خدي اشتريلي كنا بنشتري التلاتة بربع جنية والجيلي بنص جنية
فا كنا مضيعين مصروفنا علي الموز والجلي
ومرة من المرات
اتاخرنا عند بتاع الجيلي بعد ما خلصنا المدرسة
علشان مستنين الجيلي يجمد لانة كان لسة طري
فا كلهم قعدو يزعقولنا انا ورانيا
وكنتو فين لحد دلوقتي وطبعا انا وهي دة سربنا مينفعش نقول اننا مضيعين الفلوس عند بتاع الجيلي
وكنا بنعمل نفسنا مروحين مع الولاد رامي واحمد ونستخبي منهم ونروح عند الجيلي
ووقع حظنا نلاقي مين واقف في المحل
خالي
طبعا رانيا قالتلي الحقي بابا وكنا داخلين المحل بنجري كالعادة وخطبنا في رجل خالي طبعا
اول ما شفنا قالنا اية دة اية اللي جابكم هنا مروحتوش لحد دلوقتي لية
رانيا طبعا ام الحوارات
قالتلة احنا لاقيناك هنا قولنا ندخل نسلم عليك
قام شايلها وفرحان بيها بنتي حببتي كبرت وجاية تسلم عليا
قامت بصت للجيلي بوشها الطفولي الملائكي وكانها يعني اول مرة تشوفه
قالتلة بابا عايزة من دة
قالها اية دة ياحببتي قالتلة الاحمر اللي بيتهز
وهات لمني كمان تدوقة من نفسها
طبعا اول مرة ندخل المحل
ولكن الحظ دايما ملاحقنا
قام قال لراجل هاتلهم نفسهم يدقو
قالونفسهم مين دول بياكلو بالاربعة كل يوم
طبعا انا ورانيا وشنا احمر واصفر وغيرنا الموضوع
ولكن رانيا اكيد لما روحت اخدت نصبها من الضرب المبرح
وبقت تروح الكلبة تاكل من ورايا احسن افتن عليها
فا علمت صحابي وقولتلهم تعالو ناكل جيلي ولما لاقيت رانيا قالتلي انت مش قولتلي بطلتي قولتلها بضحك عليكي
اية دة كلة دة علي الجيلي اننا نسيت نفسي عارفين كل يوم كان لينا مغامرات انا ورانيا لاتعد ولا تحصي
كانت مطربة المدرسة الاولي وكان معانا شيماء ناجي هي دلوقتي بتغني واختها مروة ناجي بردة
بس وقتها كان رانيا صوتها احسن من شيماء بكتير وكنت بتفشخر واقولهم بنت خالي الي بتغني
كل يوم في الاذاعة والحفلات بتاعت المدرسة
طالعة لعمتها اللي هي مامتي
وبعدين دخلت الاعدادي
حولت مدرسة تانية مش مع رانيا
اتقابلت مع مروة
اللي حكيت عليها قبل كدا هي وريهام
كانت وقتها ايام جميلة اللي هو بكبر
ومستغربة نفسي اية دة اانا طولت وشكلي اتغير
مش الطفلة بتاعت الابتدائي
واخدنا وقتها مواد جديدة كنت مستغرباهم
وكان اللي مهون عليا المدرسة مروة واسراء
وكنا بنتفق لو هنغيب علشان كلنا نغيب
واللي تغيب من غير ما تقول للتانين ياويلها ياسواد ليلها
ومرة في سنة تانية الترم التاني دخلت الناظره قالت مين اللي جايب اقل من 12 في العربي فا مروة قامت وانا قولتلها انا مش فاكرة كام بس هقوم معاكي علشان متقفيش لوحدك وانا طبعا فاكرة بس بستعبط لان انا وهي جايبين زي بعض
انا بقي كانت العربي عقدتي في الحياة
وبالذات حفظ القران والايات والاحاديث
علشان انا ماكنتش بعرف احفظ
والسبب كان مدرس اسمة رضا
وربنا يهدية لو لسة عايش
وربنا يهدية لو لسة عايش
كان بيكرهني في الحفظ وفي حفظ الايات
وطبعا ا لفصل كلة مش انا بس
اللي هو قوم سمع
لسة الواد ياعيني هيقول بسم يقوم بالعصايا علي وشة او علي ايدة ويقولة مش حافض
كانة بيقولها بالضاض
ويشتمنا ويقولنا ياجواميس ياحمير يابجر
وكان بيبات في المسجد اللي كان متحرم علينا دخولة فا انا كنت مسمياه رضا الشرير والمسجد بيت الاشرار
علشان كان فية راجل شيخ شبة اللي بيطلع في فطيمة وكريمة وحليمة
وكل يوم لازم نتزنب عند المديرة رافعين ادينا علشان مش حافظين
الراجل دة كرهني في التسميع والحفظ كنت لدرجة اول ما اقوم اسمع من
خوفي ورعبي من العصايا وانة يضربني زي ما ضرب الواد اللي
قبلي
كنت بعيط ويغمي عليا
ويقول البت دي هتجبلي مصيبة
وببقي حافظة بس هو عملي عقدة لسة حتي الان مش سيباني وبجد ولا بعرف احفظ ولا اسمع
هتستغربو طبعا امال دخلت اداب ازاي
عادي كل المواد بعتبرها قصة واقنع نفسي بيها
كنت طول عمري نفسي اطلع مدرسة علشان اموت العيال من الضرب
واحط روج زي ميس مني
كنت بقلدها واجيب الروج الاحمر واجيب القلم الاحمر كانت بتموت في اللون الاحمر وكانت مدرسة انجليش
وكنت اجيب الورق والكربون وابص ادام المرايا
واعمل نفسي مدرسة وبشرح وكل شوية اتك علي الروج قال يعني بقي
وبعدين دخلت الثانوي
بجد سنة اولي ثانوي لو قعدت اكتب عنها في بوسط لوحدة مش هيكفي
رغم انها كانت سنة كبيئبة والمواد بالهبل
لكن كان جروب الفصل كان تحفة اتعرفت علي واحدة اسمها سمر
وكانت مسخرة بمعني الكلمة
كنا قاعدين في اول ديسك
وكانت طفسة طفاسة بتموت في الاكل
وكانت ورانا واحدة تخينة قوييييييييييي وطويلة قوييييييييييييييي وقاعدة جنبها واحدة رفيعةةةةةةةةة خالصصصصص
وقصيرة خالص
فا كنا مسمينهم سفروتة وام فرحات ست الكل
طبعا التسميات دي انااللي سمتها وطلعت عليهم من ساعتها
كانت ست الكل ام فرحات بتجيب معاها علب الجبنة والعيش البلدي وتحطة في الديسك
طبعا ماكنتش بتبين ادامنا المصيبة دي و البت سمر اكتشفنا الموضوع بالصدفة
لاقينا نمل ماشي علي الديسك
اتبنعنا خطواتة
ولاقينا ارغفة العيش البلدي الكبير
وكيس سكر وعلب جبن
قولتلها يالهوي دي جايبة المطبخ دي بتعمل اية بكل دة وبالسكر
قالتلي احنا لازم نراقبها
وفعلا رقبناها واكتشفنا انها بتجيب تورمس شاي
وبتعمل شاي لنفسها في الحصة لما تصدع من المدرس
قولنا بدل ما نخسرها نخدها في صفنا
اقترحت عليها ان كل واحدة تجيب كباية وتعملنا احنا كمان
وافقت في سبيل اننا نستر عليها
قالتلي وخدي ربع رغيف كمان لو عايزة قولتلها كتر خيرك ماليش في الاكل
وتنوعنا بقي بقينا بنجيب نسكافية وكاكو وتقدمنا كانت رحلةمش مدرسة
وفي يوم اتصايطنا
وبقينا مشهورين بالشاي وناقص علينا نعمل فرشة بربع ج الكوباية
وعرفو ان شيماء ست الكل صاحبت المشروع
فا كلة شبطان
قولتلهم اللي عايز يجيب كوباية احنا كمان هنصرف عليكم
ومرة لاقيت ست الكل بتقولي عايزين نعمل عيش بالحمة او حواوشي عندنا بنقول عيش بالحمة
قولتلها لالا انا مش بحبة اية رايك نعمل بالسجق والبسطرمة وعندنا بردة بنقول سدق هههههه
قالتلي ماشي حلو قولتلها انا هعمل
الموضوع دة تطوعت علي اساس انا وشيما وسمر اللي قاعدة جنبي وهبة سفروتة
فا الخبر وصل للورانا خديجة وفاطمة
وبعدها اللي وراهم
فا الفصل كلة عرف
وقالو عايزين احنا كمان فا طبعا انا اللي مدبسة
قامت ست الكل بما انها خبيرة في المواضيع دي قالت بهدؤ
جمعو كل واحدة تلاتة ج
وهنعمل سندوتشات كتي
ونجيب بسبسي
طبعا الموضوع علي هواها اكل وعلي الجاهز
وانا جبت ورقة وقلم وقعت اقول مين عايز بسطرمة مين عايز سدق
وطبعا دي بتدفع ودي مش معاها الا نص جنية وهتجبلي الباقي بكرة
وحوارات
روحت البيت رجل ادام ورجل ورا
اقول اية لماماعلي المصيبة دي قومت قولت يلا اقولها وخلاص
حكتلها اللي حصل
قالتلي نعم عيزاني اعمل كل دة قولتلها ماا انا هساعدك قالتلي مستحيل
وغضبت عليا كالمتوقع وادبست لوحدي قومت قعدت اعد في الفلوس ونزلت اشتري المكونات
ورحت جبت العيش وعملتة لوحدي وسويتة كمان في الفرن
ورجعت بالصواني وايديي نار وراجعة الساعة 10باليل ولا ذاكرت ولا عملت واجب وجيت نمت محستش
ماما لما لاقتني تعبت كدا صعبت عليها وقالت البت قالت كلمة للعيال ولازم تلتزم بيها قامت
سخنت السندوتشات في التوستر
وحطت البسبسي تسقع
ورصتهم فالصواني
قالتلي صعبتي عليا وانت نايمة قاعدة تحلمي وتقولي مين كان عايز بسطرمة ومين عايز سدق
وصحيت وانا رايحة المدرسة بالشنطة علي ضهري شايلة الكياس في ايدي اللي فيها الاكل والبسبسي عمالة تنزل مية علية طبعا
الاكل عند ست الكل ورحتة مفحفحة
وكل مدرس يدخل يقول اية دة رحتكم حواوشي واحنا عاملين هبل
واول ما البريك جة هجوم وقعدت اوزع
والعيال مبقوش مصدقين اللي بيحصل ولا انا
مع اني كنت اول مرة في حياتي اكل في المدرسة بس اللمة حلوة بقي
البت رانيا بقي كانت معايا كنت اروح الاقيها ماسكة الخيارة في اديها وعمالة تاكل اقولها انت مش مكسوفة تقولي هتكسف من اية يعني
وطبعا رانيا كانت في الموسيقة
وكانت بتيجي تنقذني من الحصص
وتكتب اسمي مع بتوع الموسيقي وتقولهم عايزين مني ونا طبعا جري انزل معاها واسيب الحصة واطلع لساني للعيال
كانت ايام
كنت كل يوم انا ورانيا نروح متاخر ومنحضرش الطابور
ونتزنب برة لحد ما يخلص الطابور وبعدها يفتحلونا الباب ونقف اول حصة عقاب
علي رجلينا ننضف الحوش بتاع المدرسة
انا ورانيا يوميا
وبعد ما يطلعو المتاخرين نقف في طوابير المخالفين علشان لابسين الوانات مختلفة
وفي مرة كانو مقسمين سنة تانية في طابور وتالتة في طابور فا رانيا بتتصعب كالعادة للمدرس
وبتقولة
والله يامستر اول مرة نتاخر
وانا واقفة في الطابور اللي جنبها اقولها
صادقة ياحبببتي من غير حلفان وطبعا احنا بقينا من اساسيات المتاخرين
وكل يوم اول مرة نتاخر
وكل يوم اول مرة نتاخر
والايام عديت
وتالتة اخدتها منازل علشان عملت عملية
ونجحت باعجوبة وجبت85 طبعا الناس كانت متوقعة لي اكتر بس قدر الله وماشاء فعل
وقتها فنون جميلة كانت اخدة88 فرقت معايا تلات درجات ومدخلتش
وجاتلي تجارة
فاحولت اداب
والايام جرت
واديني دلوقتي اهو اتخرجت حد يصدق
ابقي احكي عن الكلية والحاجات التانية في الجزء التاني احسن انا ذات نفسي تعبت من الكتابة مابلكم انتو اكيد تعبتو من القراءة
قريبا الجزء التاني تحت الاعداد
سلامممممممممم
