بسم الله الرحمن الرحيم
****************
في عيد ميلادي
الواحد والعشرين
فاكرين اليوم اللي خصلت فية الامتحانات
http://meyasaaa.blogspot.com/2008/06/blog-post_04.html#comments
وجيت حكيت عن ذكرياتي من اول مادخلت المدرسة لحد ما اتخرجت
انهاردة بقي هحكي عن ذكرياتي
من وانا بيبي لحد دلوقتي
وطبعا زي المرة اللي فاتت
من وانا بيبي اكيد اتحكالي يعني
مامتي قالتلي لما كنت حامل فيكي
محبتش اعرف
نوع البيبي وحبيت تبقي مفجاءة وكنت نفسي تبقي بنت
ولما جيت اولد متعبتش في الولادة
وسئلت الدكتور جبت اية
قالي جبتي بنت
فرحت ونمت من الفرحة
بس قالتلي طلعتي عيني بعدها
وكنت بعيط كتير وبصوت
نكدية طول عمري ههههههه
وكنت مش بسكت الا لما يشلوني ويلفو بيا في البيت كلة
وخالتي شوية وجوز خالتي شوية وبابايا شوية
المهم
كبرت شوية وبقي عندي سنة
وبقيت زي العسل
ياخراشي علي الجمال
وكنت قلبوظة وماما بتقولي كنتي ارشانة
واتكلمت وانا عندي سنة
وكنت باكل كتير
وكنت شقية قوي قوي
وكنت بمشي ولازالت بمشي علي اطراف اصابعي
فماما قالت هوديها تلعب بالية لما تكبر شوية
وانا كنت بموت في البالية ولحد دلوقتي كمان
بس بابا مرديش وقال لماما هتطلعي البت رقاصة هههههههه
بس كنت بلعب في المدرسة وكنت عندي بالرينا حلوة قوي
وبحب اتفرج علي حفلات الباليةواقلدهم دايما
بحس انة بيخرج كل اللي جوايا مع كل حركة ايقاعية
وبحب البالية المائي جدا
ان شاء الله هخلي بنتي تلعبة من وهي صغيرة
طالما فقدت الامل فيا دةانا كنت حاجةتانية زمان
وكلة قال البنت دي هتطلع حتة بنت
وكلة استغرب اني لما كبرت اتغيرت
وبقيت هادية
وخجولة
واني اتحجبت صغيرة
انا طول عمري بلبس لبس غريب علي الناس
لان اهلي كلهم مسافرين برة وبيعتولي لبس غريب من برة بالنسبة للناس هنا
واول مرة يطلع الكوتشي اللي بينور كان بابا جبهولي من برة
كنت بمشي في الشارع انور انا وحسن والناس تمشي ورانا زي مايكون جاين من الفضاء
ويلفو حوليا
هههههههههههه
ولما كبرت شوية كان عندي تيشرت كدا
علية من ادام وش فيل
ومن ورا ديل الفيل
فاكان ديل الفيل لونة بينك والفيل لونة موف طبعا لوني المفضل
كنت لما انزل اشتري حاجة من الشارع
العيال في الشارع يشدوني من الديل هههههههه
طلعت قولت لمامتي
انا ماليش دعوة انا مش هلبس التيشرت دة وانزل بية تاني ابدا
وماما فضلت تضحك عليا
وقولتلها متلبسنيش حاجة فيها ديل تاني العيال بيقوليولي يا ام ديل
ههههههههههههه
كان ساكن جبنا زمان ناس مسيحين
وكان الولد كل يوم ينادي عليا
انا واخوية ويقولنا
ياميناااااااا علي حسن اخوية
وانا ياكرستيناااااااااااااااااا
فا كنت انا واخوية نطلع نبص علي الولد دة ونقولة احنا مش اسمنا كدا
انا اسمي مني
ودة حسن
الواد يقولي وانا مايكل
بابا اسمة جرجس
فا انا بقي كنت بلقط من الواد
وكل ما حد يقولي اسمك اية
اقولة اسمي مني كذ كذ كذا جرجس
في الاخر
الناس تضحك وتقولي اية جرجس دي هو انت مش مسلمة اقولهم اة
بس دة اسمي
فا الناس يقولو يمكن كانو مسحين واسلمو
ولحد دلوقتي ناس كتير تشوفني وتضححححححك وتقولي مني جرجس
المهم مرة الواد دة قال لحسن اخويا
ياميناااااااااااااااا
مش هتيجي معانا الكنيسة
قام حسن راح سئل ماما
قالتلة اطلع قولة انا مسلم وموحد بالله
قام اخوية طالع قالة انا مسلم واسمي حسن وموحد بالله اشهد ان لااله الا الله واشهد ان محمد رسول الله
يوم ما حسن اخوية اتولد
كنت انا وعبير بنت خالتي
رايحين المستشفي مع مامتي
وخالتي
وكنا بنلعب في المستشفي رايحين جاين ونجري ورا بعض كاننا رايحن رحلة
كان عندي وقتها سنتين ونص
فا اول ما طلعو البيبي كان فية دم
في راسة
قولت لممرضة ايدة دة قالتلي اخوكي
قولتلها لا انا مش عيزاها انا عايزة بنت دة كمان عندة دم في راسة رجعوة تاني
عارفين فيلم الحفيد لما قالها يادكتورة انت اللي معاكي النونو
انا بردة كنت فاكرة كدا هههههههههه
كنت دايما بحب اشيلة واما حد يقولي هاتي اشيلة شوية
اقولهم لا دة اخوية انا
وماما كانت بتقولي اني كل ما اشيلة يقع مني او اقع بية ويتهبد علي راسة ف الارض
وتزعقلي وتقولي مش هتشلية وانت واقفة خدية بس علي رجلك وانت قاعدة
وحتي متصورة صورة بية وانا قاعدة
كل ما يعملي حاجة دلوقتي ازلة بالصورة واقولة ولد عيب انا اختك الكبيرة
بس مين بكلم نفسي دلوقتي اطول واعرض مني وعامل عليا راجل وكدا
كل سنة من وانا عندي سنة ماماكانت بتعملي عيد ميلاد
في مرة من المرات
كانت عملة حفلة عيد ميلادي وراحت اشترت
لعب كتيييييييييير وهدايا كتير
وعملت علي كل هدية رقم
وعملت ارقام وسحب عليها وكل اللي في العيد ميلاد يسحب
فا بنت خالتي نهال كسبت الهدية اللي انا كنت نفسي فيها
وشيفاها وماما بتحط عليها الارقام وقولتلها عيزاها قالتلي لا لو شاطرة اكسبيها
وفضلت يوميها مضايقة واقولها ماليش دعووووووووة انا عايزة اللعبة دي
ونهال تقولي واانا مالي دي بمجهودي كسبتها وتطلعلي لسانة
كنا عيال قوي هههههههههههه
انا وهي بنتفكر الايام دي دلوقتي ونضحكككككككك
كنت اروح ابات كل صيف عند نهال اسبوع او اسبوعين
واقعد العب انا ونهال وحمادة اخوها
كل يوم
وكانت نهال عاملة عليا كبيرة
هي اكبر مني بتلات سنين
كانت بتعاقبني لو زعلتها وتقولي
اقفي في البلكونة عدي سرب الحمام كام حمامية
كنت اقعد ياعيني اعد والحمام يطير بسرعة ملحقش
تقوم ماسكة عصايا كبيرة
وتقولي نامي علي الكنبة
وتقولي هضربك لو معرفتيش
البت ياخوانا كانت بتطلع العقد فيا ومستغلة سذاجتي
وكنت اعيييييييط من الخوف
وكان عندنا لعب من كل احتياجات البيت
مضرب بيض وخلاط وطقم شاي وقهوة كلة لعب زي باربي كدا
وكانت نهال تاخد بتها البلكونة وانا تحت السفرة
واروح ازورها الاقيها عاملة ديكور جامد قوي في البلكونة اشبط واقولها
انا عايزة البلكونة وانت رحوي تحت السفرة
وكنا بنحط في البراد مية ونعمل نفسنا قال يعني بنشرب شاي
ايامممممم
احلي بقي ذكريات عمري وطفولتي بجد كلها قضتها مع بنت خالي
رانيا
رانيا دي المطربة بتاعت العيلة كان ولازال صوتها حلو قوي
وكانت بتغي في مركز الثقافة وبتسافر مصر وجنوب سنيا وتحضر حفلات وكدا
وكانت بتغني في الاذاعة الاغاني الدينية
والهجرة النبوية وكلة
وانا كنت بقف معاها ممروعة بقي بنت خالي مشهورة في كل مكان بنروح فية
وكانت شريرة محدش يقدر عليها
رانيا دي كنا انا وهي بنلعب لعب وناجر عجل
ونلعب كورة
وكنت انا وهي واحنا صغيرين بنحب كاظم الساهر
ونقعد ايام زمان في الحفلات ونلبس حملات زي اللي ف الحفلات
ونمسك الدباديب ونرميها علي التلفزيون عععععععععععااااااااااااااااا
رانيا لما تتعصب انا الوحيدة اللي بعرف اهديها
بغنلها اغنية ماما زمنها جاية تقوم تضحك
كنا مرة في الشارع انا وهي ورامي اخوها
واتلم علينا شلة كلاب
وقعدو يهوهو علينا وعملو دايرة عليا انا وراينا
قام رامي سبنا وطلع يجري
واحنا بقينا نصوووووت
كنت انا وهي نلبس زي بعض
وكل حاجة اول مرة نعملها عملنها مع بعض
وادايما فاكرنها مش بننساها
ومرة وهي بتصلي وهي سجدت وهي بتقوم قالت هوباااا
ودايما تحرك ايديها بعد الصلاة وتبوس ايدها شعر ودقن
رانيا لما اتخطبت
كان شهر 8 ف الصيف دة
كنت يوميها فرحانة كانة فرحي انا
وكنت حاسة اني اطمنت عليها
وكنت واقفة جنبها
مع اني في الافراح ببقي رخمة وبفضل قاعدة مش بتحرك من مكان
ومسكت ايدي وعيزاني ارقص وهي عارفة اني ماليش ف الموضوع
بقيت مكسوفة
وغنت في فرحها للعريس
بطمنك بتاعت شرين
ووقفو الاغنية وغنت مع نفسها
والعريس بقي واقف مكسوف
بس الحمدلله عرسها كويس جدا ربنا يخليهم لبعض
وعقبالي انا كمان
ههههههه
*
كنت من صغري بلعب سباحة
وكان الكابتن صاحبنا
وكنت اخدة علية
اول مرة انزل فيها البحر
في مكان غويط
كنت عاملة زي اسماعيل ياسين في البحرية
لما كان يجي علية الدور يوم مبدل مع اللي بعدة
انا فضلت اعمل كدالحد ما لاقت مفيش حد غيري
قام المدرب التاني مش صاحبنا واحد غيرة
كانت رجيلة مقطوعة عندة رجل واحدة وكان جامد قوي في السباحة
المهم قالي يالا ياماما نطي
انا بصيت حوليا لاقيت نفسي مفيش غيري
بصيت في المية تحت لاقيت نفسي شايفة الرملة لان المية كانت نقية قوي
وبكل ثقة نطيت وهوووووووووووووب
لاقيت نفسي بنزل بنزل بنزل
ولما لاقيت كدا ومش بأب علي وش المية بقيت تحت المية بصوتتتتتتتتتت
فا طبعا عقبال ما طلعت كنت شربت مية بالهبل
فا طلعت مغمي عليا
قام كابتن هشام صاحبنا مسكني
وقعد يقولي فوقي فوقي
وانا ابدا
قام جة المدرب اللي رجلة مقطوعة دة
وضربني حتت قلم علي وشي
انا كنت حاسة اني اضربت قلم بس محستش بوجع
وفجاءة فوقت ولاقيت المية اللي في بؤي كلها بتطلع
وقولتلة انا مش هنزل البحرتاني انا عايزة البسين بس
قالي لا ياحببتي لازم تتعلمي في الاتين
ولازم تبقي شجاعة
ويوميها قعدت اعوم واعمل مسابقات مع العيال
ومن ساعتها اونا بعوم حلو
كل دة في ابتدائي
وفضلت العب لحد بداية تالتة اعدادي
وبطلت
علشان الحجاب
فترة اعدادي بقي
معملتش ولا عيد ميلاد
بزعل قوي لما مش بحتفل بعيد ميلادي بحس انة المفروض اليوم دة ابقي سعيدة لاني جيت ف الحياة
ومنكدش علي نفسي
اة عايزة اقولكم اني عمري ما جبت لنفسي نتيجة
في حياتي
الا مرة ايام الكلية في سنة رابعة
وكنت مضطرة اجبها لانهم قالو لازم الشخص نفسة
بصراحة مش بتفائل بنفسي
طول عمري بحب اللون الموف
وكل حاجتي لونها موف
الشنط والمحفظة والمقلمة وفرشة السنان والشوكة والمعلقة
الهدوم وادوتي كلها موف
كل متعلقاتي الشخصية عموما موف
ونفسي يبقي عندي دبدوب كبيرررررررررررر لونة موف
وبحب اوي الورد الموف
انا علي فكرة اللي بفتكرة بكتبة حتي مممكن تلاقو لغبطة في البوست
بس سبوني براحتي واستحملو ماشي
المهم نكمل
كانت فيةواحدة جارتنا زمان عند بيت جدي
دي كانت الانتيم بتاع ماما
وكنت بحبها موت وهي اللي حببتني ف الموف علي فكرة
وكانت محامية واتجوزت ممتاخر فاكانت بتعتبرني بنتها
انا اكبر من بنتها دلوقتي بتاع عشر سنين كدة
وانا اللي ربيت بنتها حببتي بموت فيها
كانت بتاخدني معاها المكتب بتاعها
واخد معايا كراستي واقعد اعمل الواجب
واقعد العب با الالة الكاتبة
واعمل نفسي المديرة هههههه
وبروح واجي معاها في كل مكان وكل رحلة
تقريبا كانت بتروح علشان تفسحني اصلا
وكان نفسها اني ابقي محامية زيها
بس انا للاسف خيبتلها امالها وبقيت عالمة اثار ههههههههه
بس انا فعلا بحب الحقوق
ولما اتجوزت مسكتلها الشمعة وكنت زعلانة ومش طايقة العريس
وكان ظابط وكنت بخاف منة وهو لابس البدلة وتقولي متخافيش ياماما دة حلو مش بيخوف
وكانت بردة بعد الجواز مش بتسبني ومرة كنا قاعدين قولتلها انت حامل وهتجيبي بنت
قالتلي حامل ف الشهر الكام قولتلها التاني
راحت فعلا حللت وطلعت فعلا حامل وجابت فعلا بنت
فيا شئ لله انا ههههههههه
لحد دلوقتي انا وهي صحاب قوي وبتقولي انت بينتي الكبيرة
بنتها بقي كانت بنتي انا انا اكلها والبسها واذاكرلها
وكنت عاملة في البيت حضانة لاطفال العمارة
بعلمهم الحروف والارقام بالعربي والانجليش
وكنت جايبة علبة بسكوت وتوك للشعروحاجات كدا
كل ما حد يكتب حلو اديلة هدية
وكانو كل يوم الصبح يجيبو شنطهم
ويجو وماما تصولتلي تقولي الناس بتريح دماغها وتوجعيلي دماغي انا
وكان عندي بلاك بورد كبيرةةةة وطباشير ملونة
وهيصة
كنت طول عمري بحب اقلد المدرسين ا
بس لما كبرت كرهت المهنة دي وقولت دة انا مصدقت خلصت المدرسة اروحلها تاني
لاممكن ابدااااااا
لما دخلت الاعدادي
كنت كل رمضان اتحجب وتيجي رانيا بنت خالي شياطين الانس
تقولي كلنا ف العيد هنروح نعمل شعرنا وانت لا
اقلعي اقلعي يابت
وانا بهبلي اسمع كلامها واقلع
جيت بقي لما تميت 14سنة اتحجبت
وجت في رمضان تقولي نفس الكلام قولتها بقولك اية ابعدي عني
اعملي انت شعرك انا عايزة ابقي محجبة مالكيش دعوة
وكنت بروح الجامع دايما من صغري احفظ قران واسمع دروس
واصلي الجمعة
واطلع مظاهرات تبع الجامع لفلسطين
ولما خلصت الثانوي اخر يوم خلصت فية الامتحانات
بتاعت تالتة ثانوي
رحت اشتركت في رسالة
دي جمعية خيرية
واتعلمت فيها لغة الاشارة الصم والبكم ومخارج الحروف والهجاء الاصبعي
وبعدين ف الجمعية اختاروني اني ابقي المسئولة عن نشاط الرحالات
واشتغلت في قسم تحفيظ القران والتعاليم الدينة
وطبعا كل دة للصم والبكم بما اني بعرف اتكلم معاهم
وحفظت الولد اللي كنت بدرسلة حاجات كتيرررررر
وعلمتة ازاي يصلي ويتوضا ويصوم ويقرا الفاتحة والصور الصغيرة
وخليتة ينطق
لانهم بيتكلمو بس المشكلة انهم مسمعوش كلام علشان يقولو
فا بالمحاولات بيتعلمو الكلام
وانا دة اللي حاولت اعملة طول الفترة دي
جت بقي
الكلية لاقيت نفسي بتعب من المحاضرات والمواقع الاثرية للرسالة
ف بقيت اقلل
من اني اروح بس كنت بروح زيارات وكدا ودور ايتام
ومسنين
وكنا بنفطر معاهم في رمضان مرة رحت دار مسنين
واخدت ماما وجارتنا
وعمللنلهم الاكل للدار كلها ولطبعا الجروب اللي معانا
وقضينا معاهم يوم جميل قوي ف رمضان
وبردة مرة اخدنا مدرسة اطفال الشوارع وودناهم الملاهي
دة غير بقي الملابس المستعملة كنا نفضل نفضي فيهم ونظبتطهم ونبعهم
في معرض اي حاجة بنص جنية او بجنية
بحيث الي هيجي بدل ما ياخد اي حاجة وهو ساكت لا يختاربنفسة وكمان هيدفع فلوس علشان يحس انة اشتري
وكمان بالفلوس دي بنو دار ايتام
وفرشوة
وكان احساس جميل لما الولاد البيبهات جم الدار
كنا بنطلع نلعب معاهم وهما بيبي خالص مش حاسين احساس وحش قوي
احساس اليتم دة
والاكل كنا نبعملة في اكياس للاسر الفقيرة
ونعمل لكل شنطة كيلو من كل حاجة
لان ماشاء الله
الناس بتبترع
كذا شوال من كل نوع
واحلي الانواع بصراحة جزاهم الله كل خير
ياجماعة اللي من اسكندرية وعايز يروح ياريت ميترددش
بجد اسكندرية محتاجانا قوي
وطبعا بقيت المحافظات ياريت
استفاد كتير بصراحة في حياتي اللي قضتها في رسالة عرفت يعني اية
انا عندي نعم كتير مش حاسة بيها
اني بشوف اني بسمع وبتكلم وعندي بيت واهل وعيلة
فا المفروض اللي عندة يدي اللي مش عندة مش لازم فلوس ممكن هدية عادية
ممكن تساعدة بالامكانيات اللي عندك محدش يستقل بنفسة
واعتقد دي حاجة مشرفة في حياتي وفرحانة اني عملت كل دة
واتمني كل الناس متكتفيش بانهم بيصلو يصومو ويقرو قران
وان ياريت ننفع بلدنا ومجتماعنا والله انا نفسي ارجع زي زمان وان شاء الله هرجع
بما اني فاضية واتخرجت بقي
بس عايزة اقولكم والله انا مش فاضية كل يوم كورسات
وكمان هبتدي ان شاء الله الماجستير يوم1 فبراير 2009
وطبعا هتستمر ان شاء لله تلات سنين
فا لسة مش عارفة اروح واربط نفسي هناك تاني بمواعيد والتزم بيها والاقي الماجستير بوظلي الدنيا
فا قولت اظبط نفسي ف المواعيد وارجع تاني
وباذن الله لو ليا عمر هرجع
بس عايزة اقولكم ان الكلية رغم اني ماكنتش بروح كتير ولما اروح احضر وامشي
بس بجد والله وحشتني
ووحشني كل اصحابي هناك
فاطمة وكاريمان ومي وليزا وغيرهم كتير
ووحشني كل الدكترا
دكتور اشرف ودكتور عزت قادوس ودكتور مجدي
لكن السيدات لا
كلهم بصراحة كانو متكبرين قوي ومش بيتصاحبو علينا زي الدكترا الرجال
وياما طلعنا رحالات مع دكتور عزت
وكان دايما يقول كلمة ياريس كل الناس عندة ريس
هههههههه
ورحنا اماكن كتيررررر
بالذات اماكن في اسكندرية عمري ما كنت رحتها قبل كدا
وانا كتبت عن كذا منطقة في البوستس اللي فااتت لليحب يعني يقرا عن المواقع دي
وكمان ناشرة صور
ودي لينكات
المواضيع
http://meyasaaa.blogspot.com/2008/04/blog-post_19.html
http://meyasaaa.blogspot.com/2007/12/blog-post_04.html
بس حياة الكلية عموما غير المدرسة بكتير
ودلوقتي كمان الحياة مختلفة بما اني متخرجة
حاسة اني كبرت وبقيت مسئولة كدا
وحاسة برهبة
خايفة من بكرة قوي
ومش عارفة حياتي هيحصل فيها اية وهتفضل كدا لحد امتي
وكل الناس بقي زي ما انتو عارفين
ها مفيش حاجة في السكة ومفيش عريس وعقبال العريس
فا بجد كرهوني في العرسان ههههههه مش اوي يعني
هههههههههههههه
بس لازم كل الناس تعرف
ان الموضوع دة بتاع ربنا وكمان العروسة اللي هو انا يعني
ملهاش ذنب فية ومش باديها يوم ما يجي صاحب النصيب علي راي مامتي
هتجوز ولا انتو شايفين اية
بس مش عارفة لية كل ما بيحصل ويبقي في عريس
بخاف وبتردد وبحس اني لسة طفلة ان يبقي عندي بيت
واني خلاص ادبس
وتبقي جوازة العمر
علشان كدا مش بحب اتسرع في اتخاذ القرار
واكيد يوم ما يجي الي مكتوبلي هلاقي نفسي غصب عني وافقت
حاسة اني عندي عقدة من الجواز ولا اية
هههههههههه ودلوقتي
من موقعي هذا كمان كام ساعة عيد ميلادي
الواحد والعشرين والذكرايات البسيطة طبعا اللي استرجعتها دي معاكم بودع مرحلةالطفولة والمراهقة
وهدخل في مرحلة النضج كدا وابقي بنوتة كبيرة
دة المفروض بس علي مين انا بحب ابقي علي طبعتي واحس اني مهما كبرت هفضل صغيرة
العب واهزر مع الاطفال
اتكلم بتلقائية مع الناس
واتفرج علي الكارتون وبكار حبيبي
وهفضل كدا حتي لما ابقي محافظة اسكندرية قولو امين
وبهدلكم في الاخر اغنية
انا مهما كبرت صغير
للفنان عمرو دياب
هههههههههههه
قبل ما اخلص كلامي
عايزة اقول
رغم ان المدونة دي
بقالها سنة واربع شهور او خمسة
بس والله انا حاسة كاني انا وهي نعرف بعض من سنين
وبجد والله مبسوطة اني عرفت كل اصدقائي واخواتي
منها
وهي لازم تبقي في حياتي ولازم اذكرها بالخير في ذكرياتي
واللي هتفضل معايا شغالة طول ما اانا عايشة
ان شاء الله
ودي احب حاجات لقلبي الي انا كتبتهم
http://meyasaaa.blogspot.com/2008/06/2.html#comments
http://meyasaaa.blogspot.com/2008/04/blog-post_18.html#comments
http://meyasaaa.blogspot.com/2008/04/blog-post.html#comments
http://meyasaaa.blogspot.com/2007/08/blog-post_25.html#comments
http://meyasaaa.blogspot.com/2008/01/home-lone.html#comments
http://meyasaaa.blogspot.com/2008/02/blog-post_23.html#comments
وباذن الله انا ناوية اعمل بوست لاكتر ناس بحبهم
في العالم دة
واكتب لكل حد فيهم كلمات بسيطة
واكيد في ناس كتير عارفة اني قصدي عليهم
يعني عارفين نفسهم
بصو صحيح
مجبتش جاتو ولا تورتة لسة بيتجهزو
بس البوست اللي بعدة هنزل صور الحاجات الي هعملها باديا بدل الصور بتاعت النت الهجس دي
وشوفوي بقي عمايل ايدي علشان لازم تاكلو منها
يلا
كفاية عليكم كدا
تعبتو وهاكل ضرب منكم للصبح
هههههههه
سلام
